Afdrukken
Categorie: Verhalen
Hits: 417

Fietsers zo drieste als pinken dee veur ’t eerste de weide in gaot!

De leden van FTC Kotten hebt de mountainbikes al weer meer as ne maond an d’n spieker op zolder hangen. ’t Wegseizoen is al lange weer an de gange en een groot aantal leden bereidt zich veur op d’n Amstel Gold Race-tocht. D’r wordt dus flink e’traind umme ovver een paar wèke de heuvels in Limburg de baas te können.

 

Op een zundagmorgen klunk ‘t dan: “Waor gao’w vandaage hen?” en ’t antwoord is: “Naor Lavesum bi’j Haltern.” Een mooien rit met flink wat heuvels en zowat honderd kilometer trappen veurda’j weer thoes bunt. ’t Is den dag prima veurjaorsweer, en bleuiende sleedeurne en wilde karsen stèkt prachtig af teggen ’t net oetlopende greun en teggen de blauwe locht. Wi’j peddelt met een man of achte naor ‘d’n Heimat’ en dat gif tied umme nao te denken ovver de gebeurtenissen van de leste maond. 

Ende februari was de jaorvergadering. Zo’n man of twintig was naor de Lindebeumer e’kommene umme, in ’t kader van de verjonging van ’t bestuur, Appie Meinen met applaus als ni’jen veurzitter te begroeten.

Een paar daage later zate wi’j op zundagmorgen al weer bi’j de Lindebeumer. Disse keare veur de seizoensopening en het traditionele gezamenlijke ontbijt. Daor kwam wal vievendartig man op af!! Als d’r alleene e’fietst wordt, dan komt d’r heugstens 10-15 man, maor als d’r ’t èten van een lekker ontbijt met gebakken eiere bi’j kump, dan is de opkomst inens twee keere zo groot.

Nao ’t ontbijt stapt’n de heele club op de fietse, en als ne trop ganze ging ’t schuun achter mekaare deur ’t landschap. Als ganze ovvervleegt zit ze störig teggen mekaare te ‘gakkeren’, maor de leden van FTC Kotten könt daor ook wat van: Alle prötjes oet heel Kotten gingen ovver de tonge.

Tut da’w in ‘t Woold ’t vaderland weer in kwamen, bleven A- en B-groep bi’j mekaare. Bi’j de grenze leet Jan Willem ‘t heele spul stille staon en zei dat de A-groep nog links af kon ovver de Haort en Brevoort en dat de B-groep wat vlotter naor ’t schap bi’j de Lindebeumer opan ging.

I’j hadden ton de kearls van de A-groep ens motten zeen: Waor ze zich tut dat moment nog kalm hadden e’hollene gingen ze noo tekeare als ne trop pinken dee veur ’t eerste nao d’n winter de weide in gaot. D’n eenen nog driester dan d’n ander’n! Op de vergadering was nog af’epraot dat wi’j ons dit jaor netkes an de verkeersregels zoll’n holl’n en in de darpe röstig an zölt doon, maor bi’j de kruusing op de Haort was d’r zowat geenene den ok maor iets vaart minderden. Ze raozden maor verdan! Foj, wat ’n spul!

Inmiddels, is ’t april en bu’w op weg naor Lavesum. Veur kruusingen wordt vaart e’minderd, de veursten waarschuwt de achtersten als d’r een auto an kump en d’r is röste in ’t peloton.

 

Bi’j de “Bauernmarkt” in Lavesum kö’j veur veer euro een grote komme koffie kriegen en een stuk gebak zo groot als een trottoir-tegel. In de gauwigheid kö’j daor veur d’n helen dag caloriën binnen kriegen. Dat brech Henk op ’t idee umme de route naor hoes maor iets langer te maken. En zo draeie wi’j links af, rechts af, links af, rechts af deur ’t landschap over weggeskes, dee ik nog nooit eerder e’zeene hebbe. Langzaam wordt de kracht in de beene minder, en alle windmöllens in Pruussen laot zeen da’w de wind op de kop hebt. Op zo’n moment bu’j bli’j als d’r van achter eene röp, da’w mot stoppen umdat hee mot miegen. Toch weet i’j dat Holland dichterbi’j kump, a’j achter mekaare Borken, Weseke en daorna Eunk op de bordjes zeet staon. Op de Kottenseweg wordt d’r nog effen flink vaart e’maakt veur de eindsprint naor de Lindebeumer, en als Nico daor (natuurlijk) als eersten de streepe ovver is, dan steet d’r 112 kilometer op d’n teller. Weer was ’t een prachtigen trainingsmorgen. De beene bunt stief, maor ’t heufd is weer fris.