Club foto1 compressed

‘t Weggesken slingert onder beume deur ’t greune landschap. ’t Blad is greun, de weidens bunt greun, d’n wegbarm is greun en ’t zaod is greun en ‘t kump al in de aore. Soms fiets i’j deur een golf van de lekkere locht van bleuiende garste of rogge. De zunne is ook dissen aovond al flink an ‘t zakken en een tröpken renners van FTC Kotten fietst achter ’t Zwilbrock. De kettens van de fietsen snort ovver de tandraa en de lauwe wind soest langs ’t haor op de beene van de kearls. Dit is fietsen zoals fietsen bedoeld is.

Henk van de Kok en Jan van Tuunteman riedt op kop van ’t peloton en dat betekent dat d’r flink tempo e’maakt wordt. Toch is ’t veur de rieders op de tweede, daarde en veerde riege good te volgen: achter de brede ruggen van de kearls veurop veul i’j haoste geen wind. De achtersten hebt dus alle tied umme ’t leste nie’js ovver de veurstelling van TOEP of ’t concert van Concordia deur te nemmen. ’t Meeste wordt d’r trouwens altied e’praot ovver fietsen: “He’j ’t al e’zeene? Henke van Stèmerd hef zich ne nie’je fietse e’kocht. Den olden was geleuf ik nog van staol, net as vrogger dee van Fongers, maor dissen is van carbon.” Carbon was vrogger zwart papier waor of i’j een deurslag van een breef met konden maken. Teggenswoordig weet gin mense meer wat dat is, en van carbon maakt ze fietsen. Half FTC Kotten ridt inmiddels rond op ‘carbon’.
De route geet vanaf ‘t Zwilbrock richting Rekken, en dan teggen de leege zunne in, naor Grolle en Beltrum. Iedereene deut zien portie kopwark en ’t löp echt prima vanaovond. Dat was afgelopen zundagmorgen wal anders. ’t Zol den dag dartig graden worden, maor toen d’r bi’j de Lindebeumer e’vraogd word’n: “Waor gao’w hen?”, reep d’r eene “Naor Lavesum.” Een paar keere per jaor fietse wi’j naor Lavesum umme daor bi’j de ‘Bauernmarkt’ koffie te drinken met een stuk gebak d’r bi’j zo groot als een trottoirtegel. A’w naor Lavesum gaot, dan weet i’j da’j met meer dan 100 kilometer op d’n teller weer thoes komt en da’j ’s middags veurnamelijk op de banke zit. D’r zit namelijk ook nogal wat hoogtemeters in ’t ritjen naor Lavesum: Eerst d’n bult bi’j Reken, dan nog een aantal anderen d’r achteran, en op hoes an ’t ummegekeerde spektakel. D’n lesten zundag was dat in combinatie met de hette good veur ’t verhaal van ‘de tien kleine …….’ (donkere mensen, maor ’t olderwetse woord daor veur meug i’j neet meer gebroeken). D’n eersten den af veel, draeiden al net veur Reken ’t stuur umme richting Wenters. “Jongens, ik hebbe ’t in de rugge, ik gao op hoes an. Völle plezeer wieter.” Nao de koffie was d’n thermometer al flink op e’loopene en bi’j Jan was d’r al wal anderhalven liter zweet van de kop e’dröppeld. Toch bleef ’t tempo hooge en mèt dat d’r meer kilometers af e’legd wazzen, begon ‘t achterin ’t peloton te piepen en te kraken. Tied van praoten hadden de kearls neet meer. De piepe raakten leug en de knollen raakten op. Bi’j Knüverdarp klonk ‘t: “Effen wachten jongens, d’r is een gaatjen.” Dat beteekent dat d’r eene achter is e’raakt en dat de veursten kalm an mot doon. Jan Willem kwam wal weer bi’j de groep, maor an zien rooie heufd ko’j zeen dat ’t beste d’r wal af was. Midden in Ramsdorf zag e “Eissalon San Remo”, en toen klonk ‘t “Jongens, i’j riedt maor mooi deur, ik gao hier eerst ens zitten en koope mi’j een ijsjen. Ik bun ontploft!” De rest van de groep is puffend en zwetend naor hoes e’ rene en ik denke dat d’r ’s middags nao ’t douchen een hoop vocht oet de keulkaste e’kommen is.
Op dissen woensdagaovond is dat allemaole anders. D’r wordt veurnamelijk soepel e’draeid met de hande op ’t stuur. Wal is ’t natuurlijk zo, dat Nico, op ’t leste stukke nog effen löt zeen hoo of echt hard fietsen d’r oet zut. Ook nao twee uur fietsen kan hee ‘t hele ende van Corle naor de Julianaschoole nog 40 in ’t uur trappen en dan bu’j bli’j da’j mèt könt kommen. Maor azze wi’j effen later via de Hi’jinkheukse grinte bi’j ‘Blok Holland’ weer in Kotten terechte komt is ’t al met al een mooien rit e’west. De zunne geet zowat onder, de schemme van de fietsers is wal 15 meter lange ovver ’t land en de raa liekt langgerekt ovaal. Een kilometer of 70 he’w d’r op zitten. Een mooien woensdagaovond met FTC Kotten.